اس مضمون کو ضرور پڑھیں نماز ایسے پڑھو

*اس مضمون کو ضرور پڑھیں*

*فرمان نبوی الشریف ہے کہ نماز ایسے پڑھو جیسے مجھے پڑھتے دیکھتے ہو*

   *(نماز کے مسائل)*

جمعرات 10 اپریل 2025

انجینیئر نذیر ملک سرگودھا 

بھائیو اور بہنوں!

السلام علیکم 

رسول اللہ صلی اللہ علیہ والہ وسلم نے ارشاد فرمایا

صلوا کما رایتمونی نماز اس طرح پڑھو جیسے مجھے پڑھتے ہوئے دیکھتے ہو۔ صحیح بخاری حدیث 6008۔

 

رسول اللہ صلی اللہ علیہ والہ وسلم کیسے نماز پڑھتے تھے ہم احادیث نبوی سے رہنمائی لیتے ہوئے نماز ادا کرنے کے لئے آج سے ہم نماز کے جمیع مسائل بحوالہ کتب احادیث تحریر کرنے کی ابتدا کر رہے ہیں تاکہ ہم احادیث مبارکہ کے روشنی میں مسنون نماز ادا کرنا سیکھ سکیں۔

یا رہے کہ دین اسلام میں عبادات کی قبولیت کا معیار فقط سنت نبوی الشریف ہے۔

رمضان سے قبل ہم نے الحمدللہ مسنون نماز پڑھنے کا مکمل نبوی طریقہ بیان کیا اور نماز سے متعلقہ 525 مسائل قرآن و حدیث کی روشنی میں مدلل بیان کیئے تاکہ ہم عین سنت نبوی کے مطابق احادیث شریف کی روشی میں اپنی نمازیں ادا کر سکیں۔

برادران اسلام زندگی کا کچھ بھروسہ نہیں اب فرصت ہے اور نماز مسنون ادا کرنے کا طریقہ علم حدیث کی روشنی میں اپنی نمازوں کو مسنون طریقہ سے سیکھ کر نماز محمد رسول اللہ صلی اللہ علیہ والہ وسلم  کی طرح پڑھیں۔

اللہ تعالی ہمیں مسنون طریقے سے اعمال صالح کرنے کی توفیق عطا فرمائے۔

آمین یا رب العالمین۔

*حرف آغاز*

جب میں اپنی نماز کا موازنہ مسلم و بخاری والی نماز سے کرتا ہوں تو میں فورا" اس نتیجے پر پہنچتا ہوں کہ میری نماز مسلم و بخاری الشریف والی نماز نہیں ہے تب میں اپنی ان کتب احادیث کے مطابق اپنی نماز درست کرتا ہوں اور پھر سوچتا ہوں کہ میں اپنے ہم وطنوں کو کیوں نہ باور کراوں کہ آئیں ہم سب رسول اللہ صلی اللّٰہ علیہ والہ وسلم کی طرح نماز پڑھیں۔ جبکہ رسول اللہ صلی اللہ علیہ والہ وسلم کا ارشاد بھی یہی ہے۔ فرمایا

*صلوا کما رایتمونی* نماز اس طرح پڑھو جیسے مجھے پڑھتے ہوئے دیکھتے ہو۔ صحیح بخاری حدیث 6008۔

*نماز کی فضیلت*

مسئلہ نمبر 01

*روزانہ باقاعدگی سے پانچ نمازیں ادا کرنے سے تمام صغیرہ گناہ معاف ہو جاتے ہیں*

 حضرت ابوہریرہ رضی اللہ تعالی عنہ کہتے ہیں رسول اللہ صلی اللہ علیہ وسلم نے فرمایا" تمہارا کیا خیال ہے کہ اگر  تم میں سے کسی کے دروازے پر نہر بہتی ہو اور اس نہر میں ہر روز پانچ مرتبہ نہائے, تو کیا اس کے بدن پر کوئی میل کچیل باقی رہ جائے گا ؟صحابہ کرام رضی اللہ تعالی عنہ نے عرض کیا" نہیں کسی قسم کا میل کچیل باقی نہیں رہے گا۔ آپ صلی اللہ علیہ وسلم نے فرمایا یہی پانچ نمازوں کی مثال ہے۔ اللہ تعالی ان نمازوں کے ذریعے گناہ مٹا دیتا ہے ۔(صحیح بخاری و مسلم) ۔

مسئلہ نمبر 02

*نماز گناہوں کی آگ کو ٹھنڈا کرتی ہے*

 حضرت انس بن مالک رضی اللہ تعالی عنہ کہتے ہیں رسول اللہ صلی اللہ علیہ وسلم نے فرمایا۔" ہر نماز کے وقت اللہ تعالی کا مقرر کردہ فرشتہ پکارتا ہے ۔لوگو! اٹھو اس آگ کو بجھانے کے لیے اٹھو۔ جسے تم نے اپنے گناہوں سے جلایا ہے"۔(اسے طبرانی نے روایت کیا ہے)

مسئلہ نمبر03

*پانچوں نمازیں باقاعدگی سے ادا کرنے والا قیامت کے دن صدقین اور شہداء کے ساتھ ہوگا*

 حضرت عمرو بن مرہ جہنی رضی اللہ تعالی عنہ کہتے ہیں کہ ایک آدمی نبی اکرم صلی اللہ علیہ وسلم کی خدمت میں حاضر ہوا اور عرض کیا" یا رسول اللہ صلی اللہ علیہ وسلم ! بتائیے اگر میں گواہی دوں کہ اللہ کے سوا کوئی الہ نہیں۔ آپ اللہ کے رسول ہیں اور پانچوں نمازیں ادا کروں۔ زکوٰۃ دوں۔ رمضان کے روزے رکھوں۔ رمضان میں بھی قیام کروں۔ تو میرا شمار کن لوگوں میں ہوگا  ؟" آپ صلی اللہ علیہ وسلم نے ارشاد فرمایا "صدیقین اور شہداء میں"۔ (اسے ابن حبان نے روایات کیا۔)

 مسئلہ نمبر 04

*رات کی تاریکی میں مسجد میں آنےوالے نمازیوں کے لیے قیامت کے دن مکمل نور کی خوشخبری ہے*

حضرت بریدہ رضی اللہ تعالی عنہ روایت کرتے ہیں کہ نبی اکرم صلی اللہ علیہ وسلم نے فرمایا" اندھیرے میں مسجدوں کی طرف چل کر جانے والوں کو قیامت کے دن کامل روشنی کی خوشخبری سنا دو۔"( اسے ابو داؤد اور ترمذی نے روایت کیا۔)

 مسئلہ نمبر 05

*مسجد میں آنے والے نمازی اللہ کے ملاقاتی ہیں، جن کی اللہ تعالی عزت فرماتا ہے*

حضرت سلیمان رضی اللہ تعالی عنہ سے روایت ہے کہ نبی اکرم صلی اللہ علیہ وسلم نے فرمایا۔"جس نے اپنے گھر میں اچھی طرح وضو کیا۔ پھر مسجد میں آیا وہ اللہ کا ملاقاتی ہے اور میزبانی کے لیے ضروری ہے کہ وہ اپنے ملاقاتی کی عزت کرے۔"

( اسے طبرانی نے روایت کیا ہے۔)

*الدعاء*

یا اللہ تعالی ہمیں دین کا علم سیکھنے کی توفیق عطا فرماء 

آمین یا رب العالمین

Please visit us at www.nazirmalik.com Cell:00923008604333

نماز ایسے پڑھو جیسے مجھے پڑھتے دیکھتے